*Diqqat!

Batafsil ma’lumotlarni Omonatlarni kafolatlash agentligining rasmiy veb-sayti fgd.uz' dan olishingiz mumkin.

Omonat qo‘yish — nafaqat pul jamg‘arish, balki kelajakka ishonchli sarmoyadir. O‘zbekiston Respublikasining 2025-yil 18-fevralda qabul qilingan “Banklardagi omonatlarni himoya qilish kafolatlari to‘g‘risida”gi Qonuni bilan mablag‘laringiz himoyalangan.

Yangi omonatlar uchun belgilangan kafolat miqdori

Yangi qonun talablariga muvofiq, endilikda bir bankda bir omonatchiga tegishli bo‘lgan kafolatlangan omonat miqdori 200 mln so‘mni tashkil etadi. Agar sizning bankdagi jamg‘armangiz ushbu miqdordan kam bo‘lsa, u davlat tomonidan to‘liq kafolatlanadi. Mazkur tartib qonun kuchga kirgandan keyin qo‘yiladigan yangi omonatlarga nisbatan qo‘llaniladi.

Amaldagi omonatlar uchun cheksiz kafolat

Muhim jihati shundaki, agarda sizning yangi qonun kuchga kirgunga qadar bankimizda ochilgan muddatli yoki jamg‘arma omonatlaringiz bo‘lsa, ularning xavfsizligi bo‘yicha hech qanday xavotirga o‘rin yo‘q. Bunday omonatlar, miqdoridan qat’i nazar, muddati tugagunga qadar to‘liq miqdorda kafolatlangan holatda qoladi.

Tadbirkorlik subyektlari ham himoyada

Yana bir quvonarli yangilik — endilikda faqat jismoniy shaxslarning emas, balki tadbirkorlik subyektlari, shu jumladan, yakka tartibdagi tadbirkorlarning (YaTT) ham bankdagi omonatlari davlat tomonidan kafolatlanadi. Bu biznes vakillari uchun o‘z aylanma mablag‘larini banklarda xavfsiz saqlash va boshqarish imkonini beradi.

Tizim nima uchun kerak va uning afzalliklari nimada?

Omonatlarni ma’lum miqdorda kafolatlanishi ikki asosiy maqsadga xizmat qiladi:

• Mijozlar himoyasi: Bank faoliyati tugatilgan taqdirda, omonatchilarga ularning mablag‘larini qisqa muddatda qaytarilishini ta’minlash.

• Sog‘lom raqobat: Banklarni yuqori foiz stavkalari bilan emas, balki barqaror faoliyat, zamonaviy xizmatlar va ishonchlilik bilan raqobatlashishga undash.

Mablag‘larni qaytarish: 83 kundan 20 ish kuniga qadar

Yangi qonun bilan mablag‘larni qaytarib berish muddatlari tubdan qisqartirildi. Ilgari omonatlarni qaytarish jarayoni 83 kungacha davom etgan bo‘lsa, endi bu muddat 20 ish kunidan oshmaydi. Kelgusida ushbu jarayonni yanada soddalashtirib, 7 ish kuniga tushirish rejalashtirilgan. Agarda siz belgilangan muddat ichida mablag‘ingizni olishga ulgurmasangiz, Omonatlarni kafolatlash agentligidan pullaringizni istalgan vaqtda qaytarib olishingiz mumkin.

200 million so‘mdan ortiq mablag‘larni saqlash xavfsizmi?

Kafolatlangan miqdorning belgilanishi bankka undan ortiq pul qo‘yish mumkin emasligini anglatmaydi. Aksincha, pullarni bankda saqlash ularni uyda saqlashdan ko‘ra ancha xavfsiz va manfaatli (foiz daromadlari hisobiga). 200 mln so‘mlik limit faqat bank tugatilgan (bankrot bo‘lgan) taqdirdagina kompensatsiya sifatida qo‘llaniladi. Boshqa barcha holatlarda bank omonatlar bo‘yicha o‘z majburiyatlarini shartnoma shartlari asosida to‘liq bajaradi.