“Xalqimiz bizdan korrupsiyani yo‘q qilishni kutmoqda”.

SH.MIRZIYOYEV,

O‘zbekiston Respublikasi Prezidenti

Hurmatli yurtdoshlar!

Barchamizga yaxshi ma’lumki, hurmatli Prezidentimiz Shavkat Mirziyoyev boshchiligida O‘zbekiston Respublikasining “Manfaatlar to‘qnashuvi to‘g‘risida”gi Qonuni qabul qilinib, korrupsiyani keltirib chiqaruvchi omillardan biri bo‘lgan manfaatlar to‘qnashuvining oldini olish va tartibga solishning huquqiy asoslari yanada mustahkamlandi.

Yurtimizda so‘nggi yillarda korrupsiyaga qarshi kurashish va manfaatlar to‘qnashuvinining oldini olish davlat siyosatining ustuvor yo‘nalishiga aylangan.

Buni oxirgi yillarda korrupsiyaga qarshi kurashish sohasiga oid qabul qilingan normativ-huquqiy hujjatlar misolida ham ko‘rishimiz mumkin.

Bu boradagi islohotlarning samarasini Respublikamizning korrupsiyaga qarshi kurashish tizimi bo`yicha xalqaro reyting ko`rsatkichlari yildan-yilga yaxshilanib borayotganida ham ko`rishimiz mumkin.    

“Biznesni rivojlantirish banki” ATB tizimida ham korrupsiyaning oldini olishga qaratilgan tadbirlar, uni keltirib chiqarishi mumkin boʼlgan sabab va shart-sharoitlarni barvaqt aniqlash va bartaraf etish bo‘yicha samarali, profilaktik tizim yaratishning xalqaro usullarini o‘zida mujassam etgan, mukammal boshqaruvni yo‘lga qo‘yishga xizmat qiladigan keng koʼlamli ishlar amalga oshirilmoqda.

Bundan tashqari, korrupsiyaga qarshi faoliyatni muvofiqlashtiruvchi  Komplaens-nazorat tuzilmasi tomonidan nomzodlarni ishga qabul qilishda va xaridlarni amalga oshirish jarayonlarida shaffoflikni ta`minlash, manfaatlar to‘qnashuvining oldini olish, normativ-huquqiy hujjatlarni korrupsiyaga qarshi ekspertizadan o‘tkazish,  vazifa va funksiyalarni bajarishda korrupsiyaviy xatarlarni aniqlash, baholash va bartaraf etish kabi bir qator ishlar amalga oshirib kelinmoqda.

Bunda asosiy e`tibor har bir jarayon ustidan avtomatlashtirilgan monitoring va nazorat tizimini yo`lga qo`yishga qaratilmoqda.

Shuningdek, mijozlarga xizmat ko‘rsatishda inson omilini kamaytirish va raqamlashtirish jarayonlarini takomillashtirish korrupsiyaga qarshi kurashish va uning oldini olish bo‘yicha bankimizning eng asosiy vazifalaridan biri hisoblanadi.

Mazkur murojaatim orqali, yurtdoshlarimiz va bank mijozlaridan “Biznesni rivojlantirish banki” ATB tizimida qonunchilikka zid xatti-harakatlar, huquqbuzarlik yoki korrupsiyaviy holatlarga guvoh bo‘lsangiz, bankning korrupsiyaga qarshi kurashish bo‘yicha maxsus aloqa kanallari orqali xabar berishingizni so‘rayman.

Murojaatingiz qonunchilikda belgilangan tartibda va muddatlarda ko‘rib chiqiladi hamda tasdiqlangan korrupsion holatlar bo‘yicha keskin qonuniy choralar ko‘riladi.

Murojaatim yakunida bank tizimida faoliyat olib borayotgan har bir rahbar va xodimni korrupsiya holatlarining har qanday ko‘rinishlariga nisbatan murosasiz munosabatda bo‘lishga, o‘z boshqaruvidagi faoliyatini hamda o‘z xizmat vazifalarini halol va vijdonan bajarishga yana bir bor chaqirib qolaman!

Murojaatingiz maxfiyligi bank tomonidan kafolatlanadi!