Aholi, ayniqsa, yoshlar oʻrtasida volontyorlik (koʻngillilik) harakatini kengaytirish va ijtimoiy tashabbuslarni qoʻllab-quvvatlash maqsadida “Biznesni rivojlantirish banki” ATB rahbariyati hamda navoiylik faol yoshlar ishtirokida ochiq muloqot tashkil etildi.

Uchrashuvdan koʻzlangan asosiy maqsad — jamiyatda volontyorlik madaniyatini shakllantirish, yosh avlod qalbida daxldorlik va insonparvarlik tuygʻularini yuksaltirish hamda ularning ijtimoiy ahamiyatga molik loyihalarini bank tomonidan tizimli ravishda qoʻllab-quvvatlashdan iboratdir.

Ochiq va samimiy ruhda oʻtgan uchrashuvda bank rahbarlari yoshlarning volontyorlik harakatini rivojlantirish boʻyicha yangi gʻoyalari, ijtimoiy va ekologik startap loyihalarini tingladilar.

Davra suhbati davomida koʻngillilik faoliyati nafaqat jamiyatga yordam berish, balki yoshlarning shaxsiy va professional koʻnikmalarini (soft skills), yetakchilik qobiliyatlarini rivojlantirishda muhim poydevor ekanligi alohida taʼkidlandi.

“Biznesni rivojlantirish banki” oʻz faoliyatida korporativ ijtimoiy masʼuliyat (CSR) tamoyillariga sodiq qolgan holda, hududlardagi yoshlar tashabbuslariga doimiy ravishda koʻmak berishga tayyor ekanligini bildirdi.

Uchrashuv yakunida volontyorlik madaniyatini keng targʻib qilish, viloyatda qoʻshma ijtimoiy loyihalarni amalga oshirish va eng faol koʻngilli yoshlarni ragʻbatlantirish tizimini yoʻlga qoʻyish boʻyicha istiqbolli vazifalar belgilab olindi.

Bank Axborot xizmati