Mamlakatimizda 21-oktabr – O‘zbek tili bayrami kuni sifatida keng nishonlanib kelinmoqda. Ushbu qutlug‘ sana munosabati bilan “Biznesni rivojlantirish banki” ATBda ma’naviy-ma’rifiy tadbir bo‘lib o‘tdi.

Tadbirda Boshqaruv Raisi maslahatchisi M.Jumagaldiyev so‘zga chiqib, o‘zbek tilining jamiyatimiz hayotidagi, jumladan, zamonaviy bank-moliya sohasida tutgan o‘rni va yuksak nufuzi haqida alohida to‘xtaldi. Shuningdek, davlat tilining rivojlanishi va mustahkamlanib borishi borasidagi tarixiy bosqichlarni yodga oldi.

Boshqaruv raisining ma’naviyat va davlat tili masalalari bo‘yicha maslahatchisi D.Muhammadiyev esa bank tizimida davlat tilida ish yuritish madaniyatini yanada yuksaltirish, rasmiy hujjatlar almashinuvida o‘zbek adabiy tili me’yorlariga qat’iy rioya etish muhimligini ta’kidladi. Bank tomonidan xodimlarning savodxonlik darajasi va ma’naviy dunyoqarashini boyitishga qaratilgan amaliy tashabbuslar izchil davom ettirilishi qayd etildi.

Tadbirning eng hayajonli qismida yosh xodimlar o‘rtasida o‘tkazilgan “Ommaviy diktant” loyihasi natijalari e’lon qilindi. Yuqori savodxonlik va bilimdonlik ko‘rsatgan g‘oliblarga Boshqaruv raisi nomidan faxriy diplom va esdalik sovg‘alari topshirildi.

“Ommaviy diktant” loyihasi g‘oliblari:

🥇 1-o‘rin – Asilbek Abduraimov; 🥈 2-o‘rin – Gulshoda Rafiqova, Nosirjon Nurmatov;

🥉 3-o‘rin – Saidakbar Qahhorov, Oybek Omonov, Shahruz Isoqulov.

G‘oliblarni samimiy muborakbod etib, ularning kelgusi faoliyatida zafarlar tilaymiz!