“Biznesni rivojlantirish banki”da Osiyo taraqqiyot banki (OTB) ekspertlari ishtirokida “Korporativ boshqaruv” mavzusida seminar-trening tashkil etildi.

Mazkur tadbir bankda korporativ boshqaruv tizimini xalqaro standartlar asosida takomillashtirish, boshqaruv jarayonlarida samaradorlikni oshirish, shuningdek, rahbar va mas’ul xodimlarning ushbu yo‘nalishdagi bilim va professional malakalarini yanada mustahkamlashga qaratildi.

Seminar davomida Osiyo taraqqiyot bankining yetakchi ekspertlari tomonidan korporativ boshqaruvning zamonaviy modellari, xalqaro ilg‘or tajribalar, strategik rejalashtirish, risklarni boshqarish, ichki nazorat va shaffoflikni ta’minlash masalalari atroflicha yoritib berildi. Shuningdek, samarali qarorlar qabul qilish mexanizmlari, mas’uliyat va hisobdorlikni kuchaytirish bo‘yicha amaliy tavsiyalar taqdim etildi.

Tadbir ishtirokchilari o‘zlarini qiziqtirgan savollar yuzasidan ekspertlar bilan ochiq muloqot olib borish, real amaliy holatlar asosida fikr almashish imkoniyatiga ega bo‘ldilar. Bu esa bank boshqaruv tizimida zamonaviy yondashuvlarni joriy etishda muhim ahamiyat kasb etadi.

Mazkur seminar “Biznesni rivojlantirish banki” faoliyatida ochiqlik va shaffoflikni ta’minlash, boshqaruv samaradorligini oshirish hamda barqaror rivojlanish tamoyillarini mustahkamlash yo‘lidagi izchil islohotlarning navbatdagi muhim bosqichi hisoblanadi.